ភ្នំពេញ៖ ខារ៉ាអូខេ និងសណ្ឋាគារ យីហោ 6969 ឃីសអ៊ីនធើធេនមិន ឯ.ក មួយកន្លែង ត្រូវបានអគ្គិភ័យឆាបឆេះនៅជាន់ទី៥ បណ្តាលឲ្យខូចខាតអស់សម្ភារៈមួយចំនួន និងមនុស្សប្រុសស្រី ៨នាក់បានស្លាប់ ដែលអគ្គីភ័យនេះបានកើតឡើងនៅថ្ងៃទី១ ខែកក្កដា ឆ្នាំ២០២៣ ដែលសិ្ថតនៅចំណុចផ្លូវ២០៦ ក្រុម៤៤ ភូមិ១០ សង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ។

នាយការិយាល័យនគរបាលបង្ការពន្លត់អគ្គិភ័យនិងសង្គ្រោះ លោក ព្រហ្ម យ៉ត បានឲ្យដឹងថា ដោយទទួលបានព័ត៌មានពីប្រជាពលរដ្ឋធ្វើការរាយការណ៍មកកាន់លេខទូរស័ព្ទ Hotline របស់ការិយាល័យថា មានករណីអគ្គិភ័យកំពុងឆាបឆេះខារ៉ាអូខេ និងសណ្ឋាគារយីហោ 6969 ឃីស អ៊ីនធើធេនមិន ឯ.ក យ៉ាងសន្ធោសន្ធៅ ភ្លាមៗនោះ លោកក៏បានបញ្ជាទៅរថយន្តពន្លត់អគ្គិភ័យគ្រប់គោលដៅទាំងអស់ក្នុងរាជធានីភ្នំពេញ ធ្វើការចេញជួយអន្តរាគមន៍ភ្លាមៗ។

លោកបានបន្តឱ្យដឹងថា ដោយនៅក្នុងប្រតិបត្តិការខាងលើនេះ ដោយសារតែស្ថានភាពទីតាំងខារ៉ាអូខេ និងសណ្ឋាគារ មានផលលំបាកជាច្រើន ក្នុងការជួយសង្គ្រោះអន្តរាគមន៍ទាន់ពេលវេលា ដែលធ្វើឲ្យមន្ត្រីជំនាញទាំងអស់ពិបាកនៅក្នុងប្រតិបត្តិការជួយសង្គ្រោះ ដោយនៅក្នុងរង្វង់ប្រតិបត្តិខាងលើនេះ ស្ថានភាពនៅខាងក្នុងមានផ្សែងជាតិពុលខ្លាំង ពិបាកក្នុងការចូលជួយសង្គ្រោះមនុស្ស។

លោក ព្រហ្ម យ៉ត បានបញ្ជាក់ថា កម្លាំងសមត្ថកិច្ចជំនាញរបស់នៅតែបន្តខិតខំជួយសង្គ្រោះ តែដោយសារតែស្ថានភាពខាងក្នុងពិបាក កម្លាំងសមត្ថកិច្ចក៏បានប្រើប្រាស់បំពង់ខ្យល់អុកស៊ីសែន ហៅកាត់ថា (SCBA) ក្នុងប្រតិបត្តិការនេះផងដែរ។

គួរឱ្យដឹងដែរថា ហេតុការណ៍អគ្គិភ័យដែលឆាបឆេះខារ៉ាអូខេ និងសណ្ឋាគារ យីហោ 6969 ឃីសអ៊ីនធើធេនមិន ឯ. នៅជាន់ទី៥ ខាងលើនេះបណ្តាលមកពីការឆ្លងចរន្តអគ្គីសនី ហើយក្នុងនោះធ្វើឲ្យខូចខាតឆេះខូចខាតសម្ភារៈមួយចំនួន ក្នុងនោះបណ្តាលឲ្យមនុស្សចំនួន៨នាក់ស្លាប់ ក្នុងនោះស្រីចំនួន ១នាក់, ភេទទី៣ ចំនួន២នាក់ ក្នុងនោះជាប្រភេទសំណង់ ថ្មបេតុង (៣០ម៉ែត្រ គុណ ៣០ម៉ែត្រ)។

នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានបញ្ជាក់ថា នៅក្នុងប្រតិបត្តិការខាងលើនេះ ត្រូវបានកម្លាំងសមត្ថកិច្ចជំនាញធ្វើការគ្រប់គ្រងបានទាំងស្រុងនៅវេលាម៉ោង ៨និង៣០នាទីយប់ ថ្ងៃ១ ខែកក្កដា ឆ្នាំ២០២៣ ដោយក្នុងនោះកម្លាំងសមត្ថកិច្ចជំនាញបានប្រើប្រាស់រថយន្តពន្លត់អគ្គិភ័យចំនួន ១១២គ្រឿង៕